Incomparable Himalayas

આ વિશ્વમાં અનેક પહાડો છે પણ હિમાલયની પર્વતમાળામાં જે આકર્ષણ છે તે બીજા કોઈમાં નથી. હિમાલયની એક જ મુલાકાત તમને બદલી શકે છે. માત્ર વેકેશન માણવાના સુંદર પહાડ નથી હિમાલય, તેમાં અનેક રાઝ દફન થયેલા છે. તેને દેવોનું ઘર માનવામાં આવે છે. આટલું જ નહિ, હિમાલય પર અર્ધમાનવ યેતિ (સ્નોમેન) પણ અસ્તિત્વ ધરાવતા હોવાની ચર્ચા છે. હિમાલયમાં પાચ જગ્યાઓ એવી આવેલી છે જે તમારામાં આ પર્વતમાળા વિષે ઉત્સુકતા વધારી દેશે....

👉 ગુરુડોંગમર તળાવઃ

તિસ્તા નદી જ્યાંથી ઉદભવે છે તે ગુરુડોંગમર તળાવ ખૂબ ઊંચાઈ પર આવેલુ તળાવ છે. તે કાંચનગ્યાઓ પર્વતની રેન્જમાં આવેલું છે. વાયકા મુજબ આ વિસ્તાર એક સમયે સૂકોભઠ હતો અને આ તળાવ આખું વર્ષ થીજેલુ રહેતુ હતુ. તમે આ તળાવની આજે મુલાકાત લો તો શિયાળામાં પણ તળાવનો એક નાનો હિસ્સો થીજ્યા વિનાનો રહે છે. આ એક મિસ્ટ્રી છે. લોકવાયકા મુજબ એક સમયે બૌદ્ધ ગુરુ પદ્મસંભવના ચરણનો સ્પર્શ આ તળાવને થયો હતો અને લોકોનું જીવન આસાન બનાવવા તેમણે આશીર્વાદ આપ્યા હતા કે તળાવ ક્યારેય નહિ થીજે. સ્થાનિક લોકોના જણાવ્યા મુજબ તળાવમાં એક હિસ્સો એવો છે જે ગમે તેવા શિયાળામાં થીજતો નથી.

👉 રૂપકુંડ તળાવઃ

ઉત્તરાખંડમાં આ રૂટ ટ્રેકિંગ માટે ખાસ્સો લોકપ્રિય છે. રૂપકુંડ તળાવની લોકપ્રિયતા પાછળ એક ખાસ મિસ્ટ્રી છે. મુલાકાતીઓનું કહેવું છે કે અહીં માણસોના અવશેષો મળ્યા છે. એક થિયરી મુજબ આ હાડપિંજરો બીજા વિશ્વયુદ્ધના સૈનિકોના છે. તેમના પર મોટો પથ્થર પડતા તે દબાઈ ગયા હતા. બીજી થિયરી અનુસાર તે રાજાના પરિવારના છે અને માતાજીએ તેમને આ રીતે મૃત્યુનો શ્રાપ આપ્યો હતો. પરંતુ વાસ્તવમાં આ હાડકા કોના છે, કઈ રીતે આવ્યા તે કોઈ નથી જાણતું...

👉 કોણે બનાવ્યો આ આશ્રમ?

ભૂટાન ફરવા જાવ ત્યારે આ જગ્યા ચોક્કસ ફરવા જેવી છે. એક સીધું ઊંચાણ ધરાવતા પહાડ પર બનેલા બૌદ્ધ આશ્રમ પાછળ એક લોક વાયકા છે. સ્થાનિકો માને છે કે ગુરુ પદ્મસંભવે અહીં ત્રણ વર્ષ, ત્રણ મહિના, ત્રણ દિવસ અને ત્રણ કલાક માટે તપસ્યા કરી હતી. હવે રહસ્ય એ છે કે આજની તારીખે આ જગ્યાએ ચડવું ખૂબ જ મુશ્કેલ છે. માન્યતા મુજબ ગુરુ પદ્મસંભવ તિબેટથી ઊડીને આ જગ્યાએ પહોંચ્યા હતા આથી તેને ટાઈગર્સ નેસ્ટ નામ મળ્યું છે. આ આશ્રમ ધ્યાન કેન્દ્ર તરીકે 1692 માં બંધાયો હતો. હવે આવી વિકટ જગ્યાએ બાંધકામ કેવી રીતે થયું તે વિચારવાનો વિષય છે.

👉 ગંગખાર પ્યુએનસમઃ

આ દુનિયાનું એવું શિખર છે જ્યાં કોઈ ચડી નથી શક્યું. તેનું માપ લેવાની અનેક વખત કોશિશ કરાઈ છે પણ સફળતા નથી મળી. ભૂટાનના લોકો માને છે કે અહીં યેતિ, દેવો સહિત પવિત્ર લોકો વસે છે. તેને ચડવાના અનેક નિષ્ફળ પ્રયાસ બાદ આ પર્વત અંગે અનેક વાયકાઓ પ્રચલિત બની છે. અહીં ચિત્ર વિચિત્ર ઘટનાઓ પણ બનતી હોવાનું જાણવા મળ્યું છે, એવા અવાજો થાય છે જેનો કોઈ ખુલાસો ન થઈ શકે અને રાતના સમયે રહસ્યમયી લાઈટ્સ પણ જોવા મળે છે. આ પર્વતની નજીક રહેતા લોકોએ ભૂત-આત્મા જોયા હોવાનો પણ દાવો કર્યો છે.

👉 જ્ઞાનગંજઃ

જ્ઞાનગંજને અમરોનું શહેર કહેવાય છે. તે પણ હિમાલયની એવી જગ્યાએ આવેલું છે જ્યાં પહોંચવું શક્ય નથી. ઘણા પર્વતારોહકો અને ટ્રેકર્સે તેનું ચોક્કસ લોકેશન્સ જાણવાની કોશિશ કરી છે. સેટેલાઈટ અને મેપિંગ ટેક્નોલોજીથી પણ આ પર્વતનું મેપિંગ કરવામાં સફળતા નથી મળી. તિબેટ અને ઈન્ડિયાના ભારતીયોનો દાવો છે કે જ્ઞાનગંજ માત્ર એક જગ્યા નહિ, કંઈ વિશેષ છે. અહીં માત્ર સંત, યોગી અને પવિત્ર લોકો જ જઈ શકે છે. જે અહીં રહે તે અમર થઈ જાય તેવી પણ વાયકા છે. અમુક ધર્મગુરુઓએ આ સ્થળની મુલાકાત લેવાનો દાવો કર્યો છે પરંતુ સિદ્ધ નથી કરી શક્યા....





©️®️

🎯 Writer : Prof.Dr.Vaibhavi Trivedi 

🎯 Matusri Shantaben arts College 

👉 Image courtesy : Google 

 👉 Notice📖

The translator is configured on the web version for your convenience, so that you can translate and read your favorite articles in your native language.....